أفتاكسات زوج محظور
(الجزء الثانى ) أفتاكسات زوج صايم
إيمان العادلى
الحلقة الثامنة والأربعون
(الجزء الثانى ) أفتاكسات زوج صايم
إلهام وممدوح
صبح الصباح فتاح يا عليم ويوم جديد تانى من الحظر و٠٠٠٠٠٠
إلهام : بص بقى انا مسافرة ومش قاعدة لكم تانى
ممدوح : يعنى اية مش قاعدة تانى
اتجننتى على الصبح
الناس تصحى تقول صباح الخير الأول
خالد : اية يابابا مش قادر افتح عينيا صوتكم مسمع الدنيا
الهام: روح نام مش ناقصاك انت كمان
ممدوح : شوفت الرد على الصبح اتفرج بقى على النكد الصباحى
خالد :خير ياماما مالك على الصبح
الهام : انا مسافرة عند أختى أمال اتخنقت من القعدة ومن الكل
ممدوح :شوفت بقى الكلام اللى يفور الدم والاسلوب
الهام :ايوه انا كده ومش مستحملة مسافرة يعنى مسافرة
رهف: والله انا تعبت منكم مش عارفة انام ومين عاوز يسافر فى الايام المهببة دى
الهام: هو انتى كمان يامفعوصه هاتتكلمى
رهف : انا ياماما مفعوصة ميرسى ياماما والله لاروح انام يكش تولع الدنيا ها
ممدوح: عجبك كده حتى البنت بتتكلم زيك وباسلوبك
خالد: انا زى الاطرش فى الزفة مش فاهم حاجة خالص
ممدوح: ماما عايزة تسافر عند خالتك فى الغردقة وتغير جو والدنيا متهببه كورونا
ومش ناقصة هى مناعتها ضعيفة ومش مستحملة
خالد :شوفتى يا حبببتى بابا خايف عليكى ازاى
الهام: مليش دعوة انا مش صغيرة وبعرف اتعامل ازاى واخد الاحترازات كويس
خالد : ياماما بالعقل كده هو ده وقت فسح وغيره
طيب احنا بقى نعمل اية نطق احنا كمان يا حبيبتى
ما كلنا فى الحظر سوا
ممدوح : كده هاتعملى فتنه فى البيت ( ومش هعرف اسيطر على العيال هايعملوا زيك)
خالد : صوتك واطى لية يابابا مش عايزنى اسمع ايه
ممدوح: هو انا اتكلمت بهزر مع ماما وبقولها مانقدرش نستغنى عنك ولايوم
الهام: أيوة اضحك عليه زى كل مرة
وهو انا محكوم علية مؤبد اكنس وامسح واطبخ واطبطب وخلاص
حتى أشيائى مش عارفة أعملها
وكمان بتنكد عليا ليل نهار
ممدوح : أنا برضه أللى بنكد عليكى بذمتك يا شيخة
ده أنا عملتلك فطور ملوكى إمبارح فضحتينى عليه
إلهام : ما هو من سؤ نواياك يا دوحة
طيب خلاص شوف الفون بتاعك بيرن
ايه ده ورينى كده مين بوسى دى
إهئ إهئ
ممدددددوح طلقنننننى
طلقنى بقولك
يوووووة أستنونى بكرة
يجب عليك تسجيل الدخول لكتابة تعليق.