أفتاكسات زوج محظور
(الجزء الثانى ) أفتاكسات زوج صايم
إيمان العادلى
الحلقة التاسعة والأربعون
(الجزء الثانى ) أفتاكسات زوج صايم
إلهام وممدوح
إلهام شافت رنة الفون بتاع ممدوح وهوبة نشوف
إلهام : مين بوسى دى رد يا بيه على الفون قدامى ولا أقولك طلقنى أحسن
ولا هات حفتح انا
ممدوح : أيه فى ايه يا هانم دى بوسى أللى كانت ماسكة محل البلاى ستشن أنتى نسيتى ولا أيه
إلهام : رد عليها قدامى يا رميو
ممدوح : لا ده أنتى أتجننتى خلاص ولا أقولك سافرى عند أختك هدى أعصابك وأرتاحى ( وريحى )
إلهام : أه عاوزنى أسافر علشان يخلى لك الجو طبعا
مش مسافرة يا بيه وورينى الفون ده انا حرن عليها وتكلمها قدامى
ممدوح : طيب عند على عندك مش طالبها ها وورينى حتعملى أيه
خالد : يوووه يا ماما عيب عليكى تعملى كده وأنت يا بابا أهدى شوية وبطلوا خناق حرام عليكم مش كل يوم
رهف : أنا كرهت الحظر ده يارب
نفسى أطفش بقى منهم
إلهام : تطفشى يا زفته وأنت كمان يا زفت
ده تلاقيه متجوزها عرفى الهانم بوسى دى وأنا نايمة على ودنى
ممدوح : عيب يا إلهام الكلام ده قدام العيال وأتقى الله يا وليه هو أنا بخرج من البيت خالص حتجوزها أمتى دى
إلهام : ما أنت متجوزها من زمان قبل الحظر والهانم مش قادرة على بعدك وبتتصل بيك إهئ إهئ وأنا يا عينى عليا فانية نفسى وشبابى فى خدمتك أنت وعيالك
خالد : يا ماما إهدى بس وأحنا حنعرف مالها بوسى الزفت دى
ممدوح : عيب يا واد وأتلم خالص وخد اختك يلا وأدخلوا أوضكم
رهف : يوووه بقى أحنا تعبنا وقرفنا بقى منكم ( توب علينا يارب من الحظر)
ممدوح : عيب عليكى وأتلمى بقولك فى يومك اللى مش فايت ده
إلهام : مردتش عليها ليه وهى بترن عليك ها
علشان طبعا الغلبانة انا الغفلانة واقفة جنبك
بس ربنا مبيرضاش بالظلم وكشفك ليا
ممدوح : أستغفر الله العظيم صبرنى يارب على الست دى
يا هانم انا مردتش علشان بنتخانق وصوتنا عالى عاوزة تفضحينا كمان قدام الناس اللى بتشتغل معانا
إلهام : أنا برضه اللى بفضحك ولا عمايلك يا سى دوحة
من يوم ما أتحظرنا وأنت مقضيها إشى جروبات مع الستات وإشى الست أنغام جارتنا وجارة جارتنا
وانا أقول معهلش يا بت محظور وبيفضفض سيبيه ميضرش ومتجيش عليه
حتبقى أنتى والحكومة إهئ إهئ
إنما توصل لجواز ده اللى مرضهوش أبدا
طلقنى بقولك إهئ إهئ
ممدوح : يا ست إتقى الله وأتهدى بقى عيب عليكى
خالد : بابا يا بابا
خد كلم بوسى بترن على فونى وعاوزاك
إلهام : شفتوا مش قادرة على بعده الهانم
ممدوح : إوعى كده من وشى
الو ايوة يا بوسى الحمد لله
خير فى أيه
بتقولى ايه يا نهار أسود
طيب أقفلى مع السلامة أنا جايلك بسرعة
إلهام : فى أيه مالها الهانم طلعت حامل
ممدوح : إبعدى عن وشى لاقتلك يلا يا خالد البس بسرعة وتعالى معايا نشوف المصيبة دى
خالد: فى أيه يا بابا
ممدوح : المحل ولع الكهربا ولعت فى اوضه منه
إلهام : يا لهووووووووى
من الحظر وعمايله
أستنونى بكرة ونشوف أخرة
إلهام وممدوح
يجب عليك تسجيل الدخول لكتابة تعليق.