العاصمة

أفتاكسات زوج محظور

0

(الجزء الثانى )أفتاكسات زوج صايم

إيمان العادلى

 

الحلقة التاسعة والخمسون

 

إلهام و ممدوح

 

(الجزء الثانى )أفتاكسات زوج صايم

 

بعد خناقات وشوية حبشتكنات

ممدوح صالح إلهام

و ٠٠٠٠٠٠

 

إلهام : صباح الخير ياحبيبى

 

ممدوح : صباح النور ياحبيبتى..خير لابسه كده ورايحة على فين؟

 

إلهام : رايحة ل سهام صاحبتى أشوف الكارثة اللى حصلت لها

بس أعملى ساندوتشين بسطرمة حلوين من إيديك وكوباية شاى

 

ممدوح :بالهنا والشفا يا ستي.. كلى واتهنى وبرطعى.. هيصي مع الطعام والشراب المختلف الوانه وقوامه واصرفى من الأموال ما شئتى ماهو في ثور مربوط في ساقيه عمال يلف ليل ونهار علشانك انتى وعيالك

 

إلهام :دلوقتى بقوا عيالي.. كنست عليك السيدة يا شيخ… طب انا راضيه ذمتك

 

ممدوح : مالها ذمتى سبيها فى حالها هى كمان محظورة اليومين دول

 

إلهام : شفت جوز سهام الواطى أبو عين فارغة اتجوز عليها

 

ممدوح :وبعدين

 

إلهام : وبعدين ايه بقولك اتجوز عليها وأنا رايحة أهديها ونشوف لنا حل فيه أبو عين زايغة ده

 

ممدوح : تهديها فى ايه مش فاهم يعنى هو اتجوز عليها عادى يعنى

 

إلهام : عادى انت بتقول عادى

 

ممدوح : ايه فى إيه إنتى بتبحلقيلى كده ليه

 

إلهام : ببحلقلك ياسى دوحة ليه هو انت ممكن تفكر تتجوز عليَّا

 

ممدوح : بصى ياحبيبتى الشرع محلل للراجل أربعة و…..

 

إلهام :شرع أيه دلوقتى ودار أفتاء مين أنا بسأل سؤال محدد

هو أنت ممكن تفكر تتجوز عليا

 

ممدوح: انتى بتبرقى كده ليه

 

إلهام: مفيش أنا خارجة ورايحة لها و رجعالك تانى خلى بالك من نفسك يا بيبى

 

وبعد شوية

 

إلهام : أنااا جيت يا بيبى

 

ممدوح : نورتى يا روحى

خير احكيلى جوز سهام أتجوز عليها ليه ( والله راجل وعمل اللى كل الرجالة نفسها تعمله )

 

إلهام: الناقص أبو عين زايغة أتجوز البت الممرضة اللى شغالة معاه

شفت يا دوحة السفالة

 

ممدوح : هو يعنى لو دكتورة تمشى

 

إلهام : أنت بتدافع عنه ولا أيه

لأ خد لبالك ده انا مخلفة لك عيال روحهم فى أمهم ولا يكسروش لها كلمة

 

ممدوح : وأحنا مالنا يا حبيبتى وبعدين الواد خالد اى نعم هو شبه امه ودي ممكن أعتبرها اعاقه شكليه لا تؤثر في مضمون الواد.. بكره اخليه شبهي ماهو مش معقول انا اللى أصرف وأطفح وفي الاخر يكبر يقول ست الحبايب يا حبيبه ده انا اطرده بره البيت هو وأمه هههههه

 

إلهام : نعم يا سى دوحة تطرد مين

 

ممدوح : بهزر يا إلهام معاكى بطلعك من جو الجواز ده وبنسيك مشاكل سهام

 

إلهام: حبيبى يا دوحة وقلبى أنت أنا حغير هدومى وأعملك كوبيتين عصير وأجبلك حتتين جاتوه وأدلعك يا عيونى

 

 

ممدوح :على العكس من ظن البعض الوضع المستقر ده مخلينى قلقان

نحمد ربنا ليل ونهار اه.. بس الطبيعي في الدنيا هو ان الانسان يتبهدل.. لما بلاقي الدنيا ماشيه كويس بقلق وبقول استر يارب.. لان الضربة لو حصلت وقت الرخاء بتبقي قاسيه اوى

يا عينى عليك يا دوحة لما تبهدلك إلهام

 

و ٠٠٠٠٠٠٠

أستنونى بكرة

اكتشاف المزيد من بوابة العاصمة

اشترك الآن للاستمرار في القراءة والحصول على حق الوصول إلى الأرشيف الكامل.

Continue reading