العاصمة

الأمان..٢

0

 

رانيا أسامة

ليه في طرف حاسس انه مقدم كل سبل الأمان… والتاني مش حاسس وبيعاني.؟؟؟ مفتقد الاحساس بالأمان والاستقرار…بعيدا عن الكذب والصد والخيانة والاهانة

️ بإختصاااار شديد
انت لو عزمت واحد صاحبك… وكلفت نفسك كل أنواع المشاوي والطيور واللحوم…
وهو جه جعاااان… واقع من الجوع..
ولما قعد ياكل… طلع كل الاكل مش مناسب… ومافيش حاجه بيحبها لانه نباتي…
اوبااااااا….. ده انا نسيت انه نباتي
يلا ياكل سلطة بقى…

هو ممكن ياكل حاجات بسيطة انت مهتمتش بوجودها اصلا وكانت بالنسبة لك كماليات ع السفرة.
هو هيرضي بالموجود… بالمتاح… وهيسكت
ممكن يلتمس لك العذر… ويفتكرك مش عارف.
ولكن

هو مش هيقوم راضي
هو مش هيقوم شبعان
هو مش هيحس بأنك قدرته
في حاجه اساسية ضرورية غير مشبعة

وانت تعبت… وكلفت… بس فالاتجاة المعااااكس

لازم تكون عارف ايه اللي محتاجه شريكك فالعلاقة علشان تحقق له الأمان… وده بيبان من العشرة.. والمناقشات.. من اهتماماته وهواياته…. من ملامح وشة .. وطريقة انفاقة.
?️ولو انت ملاحظتش كل دول يبقى سيبه لغيرك يحبة ويراعية.

عدم الاحساس بالأمان النفسي… بيتولد فاللحظة اللي انت بتصر فيها انك تفضل تقدم نفس وجبات اللحوم للشخص النباتي…. وانت عارفة انه هيفضل جعان…
ويمكن كمان تصر انه ياكل منها بالإكراه..
أو حتى تصرح له… هو ده اللي عندي… لو كان عاجبك
سواء بجد او بهزار،
الاحساس بعدم الأمان والاستقرار النفسي…. انت اللي بتخلقة
وتربية… وتكبرة… وساعات تستمتع به… وتصر وتحرص على استمراره…. لمجرد انك حاليا مريح دماغك
لمجرد انك مش عاوز تتغير
لمجرد الاستسهال
ويمكن لمجرد احساسك بأن طالما صاحبي اكل طبق السلطه وشبع كده تماااام من غير ماحتي تحاول تعرف… شبع ورضى اولاء… هو انا عملت كل ده وكمان هيتبطر
بس ليه مش بتفكر ان مع الوقت هيمل… هيزهق… ويبعد…

انت بقى يالي كلت ومشبشعتش وماقلتش…. ساكت ليه؟

❓هل لان المشاعر بتتحس بس ماتتقلش؟؟؟
❓هل لان الاهتمام مابتطلبش؟؟؟
❓ولا انت قلت… واتصديت.. واتصدمت؟؟؟
❓ولا هناك اسباب أخرى؟؟؟؟

الموضوع فعلا معقد جدا…

خلينا متفقين ان الأمان… حاجه اساسية… الحياة بدونها ️عذاب
قله راحه
️ضيق فالصدر
️توتر وعصبية
خنقة
️والأمر بيوصل مع الناس الحساسة والمرهفة المشاعر للمرض والاعياء.
لما يوصل الأمر لأنك متوتر طول الوقت… لحد ماتمرض يبقى انت فمرحلة الخطر?

نرجع للاسئلة⁉️
هل انت ساكت لأنك شايف ان الأمان مش بيتطلب لانه احساس…؟؟
✔️طيب ما الجوع احساس
✔️والعطش اخساس
✔️والبرد والحر والنوم والرغبة الجنسية و الإرهاق والتوتر….. الخ
?كلها أحاسيس وبنعبر عنها… وبتتطلب سواء بالتصريح او التلميح

ليه مش بنطلب الأمان؟؟؟

رغم انه السبيل الوحيد للحياة بشكل مستقر…
رغم ان ممكن نكون بنستمد قوتنا منه⁉️

️مع ملاحظة ان:
الأمان مش شعور بين ست وراجل بس…
الأمان لازم يكون محسوس بين افراد الأسرة الواحدة…

لو الزوج مش حاسس بالأمان… وده صعب شوية لانه دماغة عمليه اكتر.. بينفصل فورا ومش بيستمر فعلاقة هو بيتخان او بيتهان او متقرطس فيها…
لانه بيبقى غالبا محتاج الاهتمام (ايا كان نوعة…) اكتر من الأمان، لأنه لو مختار من الاول بنت أصول محترمة مش هيفقد الأمان…

الاطفال لو مش حاسين بالأمان… بينحرفوا سواء نفسيا او جنسيا وده أخطر شىء ممكن يحصل

الام لو مش حسة بالأمان… بتعمل ايه؟؟؟
بيبدا الأمر بالأهمال بتهمل للأسف حتى نفسها
ممكن بيوصل معاها الأمر انها تكره نفسها……
الإهمال الناتج من انها مُهمَلَة.. ومش سعيدة… انها ممكن تكون تحت نقد واستفزاز اغلب الوقت ده غير لو وصلها انها بتتخان او تتهان..
الإهمال الناتج من انعدام قدرتها ع التركيز..
الإهمال الناتج من تشتت مشاعرها…وخصوصا
️ لو بتحب الشخص اللي سبب لها عدم الأمان.. وكسر قلبها
️ولو عاوزة تريح حد مش مفهمها هو عاوز منها ايه
ولو بتسعي جاهدة… تخلي كل حاجه مظبوته.. بس مع تشتتها وقله راحتها… مش قادرة.
الإهمال الناتج من احساسها انها مرفوضة وغير مرغوبة… ودي الحاجه اللي ممكن تدمر اي انثي(دي طبيعة الأنثى)
لأن مشاعرها استثنائية… طبيعة ربانية..

اكتر شخص بيتاثر بفقدان الأمان فالحقيقة وللأسف هو الست… والست الحساسة قليلة الخبرة واللي بيسموها الطيبة
دي اكتر واحدة بتنهار قصاد الشعور ده…

دي مقدمة طويلة شوية معلش قبل ما نقدر نجاوب على الأسئلة اللي فوق…
#خلاصة_تجربة
يكمل…

اكتشاف المزيد من بوابة العاصمة

اشترك الآن للاستمرار في القراءة والحصول على حق الوصول إلى الأرشيف الكامل.

Continue reading