مطلوب عروسة
إيمان العادلى
الحلقة التاسعة عشر
بعد معاناتى مع بيوت العرايس وشفت كل الأصناف وكل الأنواع وللاسف متوفقتش فى أى عروسة
يكونش العيب منك يا حمادة
لا لا العيب مش منى أنا حلو وزى الفل هما أللى ليهم حاجات غريبة بصراحة خسارتك فيهم يا واد يا حمادة
أميرة : حمادة أين أنت يا عريس
حمادة : عريس فى عينك أسكتى خالص مش عاوز أى عرايس منك أهو قفلت عليكى بدرى بدرى
أميرة: ليه بس كده يا عريس مايمكن طلبك عندى بتقفلها ليه
حمادة : أسكتى أنتى يا وش النحس ده انتى بتشوفى كل حاجة شمال أستحالة أامن لك تانى أنتى وأختيارتك
أميرة : مقبولة منك يا عريس أخويا الكبير برضه عموما حبيت أبلغك أن قلت ل ماما على العروسة
وماما وبابا وافقوا وخدوا ميعاد و ٠٠٠٠ أى أى طب ليه كده طيب
حمادة : مااااما يا ماما أزاى تاخدى ميعاد للعروسة من غير حتى ما أعرفها مين و ٠٠٠٠٠٠
الحاجة أميمة : جرى ايه ياواد عامل دوشة ليه اختك قالتلى وأبوك سأل عليهم وخدنا ميعاد الخميس الجاى أن شاء الله
حمادة : هو فى حاجة عدلة مجايب اميرة برضه مين العروسة دى
الحاجة أميمة : دى مدرسة إنجليزى إعدادى وحلوة زى القمر أخت ريهام صاحبة أميرة أختك
وابوها مدير مدرسة لغات وأمها موجهة إنجليزى ناس أفاضل وسمعتهم طيبة وخلاص خدنا ميعاد تشوف العروسة حنان وحجزنا التورتة كمان
حمادة : الأمر لله
وهوبه ٠٠٠٠
الحاج محمود : رن الجرس يا حمادة يجعلها من نصيبك يا أبنى
ابو العروسة : أهلا وسهلا اهلا بيكم شرفتونا ونورتونا اتفضلوا
حمادة : شكرا يا عمو النور نوركم
ام العروسة :نورتونا يا أهلا وسهلا
أزيك يا أميرة يا حبيبتى كده مشفكيش من بدرى أتفضلوا هنا فى الصالون
الحاجة اميمة : نورك يا حبيبتى ونور عروستنا القمر
حمادة : الناس مريحين جدا وعاديين زينا وبيتهم جميل وذوقه حلو برغم بساطته يارب تكون هى مسك الختام بقى و ٠٠٠٠
الحاجة اميمة : أيه يا أميرة ما تقومى أنتى وريهام جبولنا عروستنا الحلوة نشوفها
أم العروسة: تعالى يا ريهام سلمى يا حبيبتى على عمو وتانت وعريسنا ا احمد
حمادة : اهلا وسهلا أنسة حنان ( الله دى حلوة اووى ورفيعة ) يارب تكون مسك الختام و ٠٠٠٠٠
أميرة : حستأذن من حضرتك ياعمو العرسان يقعدوا شوية مع بعض جنبنا يتعرفوا على بعض
أبو العروسة : اه طبعا أحنا حنخرج فى الليفنج وأقعدوا مع بعض يلا يا جماعة
حمادة : اهلا أنسة حنان
العروسة : أستاذة حنان بحب اللقب ده اكتر
حمادة : (أستاذة ) استر يارب
ماشى يا أستاذة انا مهندس مدنى وعندى ٠٠٠٠٠٠
العروسة : اه ريهام أختى قالتلى
هو معهلش فى سؤالى يعنى أ أحمد هو حضرتك بيدخلك دخل شهرى أد ايه
حمادة : الحمد لله دخل كويس ويعيشنا ونفتح بيت زى الفل و ٠٠٠٠
العروسة: ايوة كام يعنى أدينى رقم حضرتك ا أحمد هو مش حقى أعرف برضه
حمادة : اه طبعا حقك
بصى يا ستى أنا دخلى 30000 ج الحمد لله (ههههه أكييد حتتجنن من دخلى وأنا شاب كده )
العروسة : ههههههه 30000 شهريا بس
حمادة : بس أزاى يعنى مش فاهم يعنى هو مش حضرتك مدرسة ومرتبك تقريبا 2000ج و ٠٠٠٠٠
العروسة : ههههه أيوة بس انا بدى دروس خصوصية ا احمد عارف دخلى الشهرى كام 200000ج
و٠٠٠٠٠٠
حمادة : بتقولى كام 200000ج شهريا من الدروس ليه ده اقتصاد شركة المبلغ ده
العروسة : ههههه الله اكبر
شوف أ أحمد انا مقدرش اسيب الدروس الخصوصية اللى بديها ولو حنتفق انا وانت فى المواضيع دى نفكر فى الخطوبة
حمادة : نتفق على ايه أنسة حنان
العروسة : شوف أ أحمد انا بخلص المدرسة بلف على الدروس عندى كام بنت أغنياء بروح لهم البيت بخلص على 7 بروح البيت باقى العيال بيجيوا هنا مجموعات لحد الساعة 11بليل أخلص أكل لى لقمة وأنام و ٠٠٠٠٠
حمادة : ايوة وأنا أمتى بقى حشوفك ولا أكلمك الجمعة مثلا
العروسة : لا لا جمعة أيه بس ده اليوم الاسبوعى لامتحانات الدروس للعيال ووالله بأنهك فيه فعلا
حمادة : أمال أنا حشوفك أمتى لو حصل نصيب وأتجوزنا
العروسة : عندك شهر 7 اجازة عندى نقضيه مع بعض ايه رأيك
وبعدين متقلقش خالص أوضة الدروس حجهزها أنا من سبورة وغيره هى مش شقة حضرتك 3 أوض برضه
حمادة : أه اوضة كمان فى الشقة وعيال خارجة وداخلة ومورستان
افرضى انى شرطت عليكى تسيبى موضوع الدروس ده
العروسة : أسيب أيه الدروس
لأ طبعا أنسى
الدروس دى حياتى ومستقبلى ودخلى ده أنا عليا أقساط شاليه فى السخنة واقساط شقة فى الشروق أجيب ده كله منين وبعدين ماهو كله حيبقى لعيالنا يعنى لو حصل نصيب
حمادة : عيال أه ( ودول بقى حيجيوا أزاى ) بصى يا أنسة أنا مش موافق على موضوع الدروس ده خالص أنا عاوز مراتى انا اصرف عليها أو يكون دخلها موازى لدخلى وتكون كمان متواجدة فى البيت بهدؤ أرجع لبيت مش مدرسة
العروسة : وأنا كمان أرفض اى جواز يحرمنى من دروسى ودخلى
حمادة: تمام يا أنسة مفيش نصيب
بابا يا بابا أنتى يا وش النحس يا أميرة هلموا بنا
الحاج محمود : (الواد غمزلى) يبقى متوفقوش و ٠٠٠٠٠
حمادة : بعد إذنك حتكلم أنا يا بابا
شوف يا عمو انتم ناس زى الفل لكن انا منفعش مع بنت حضرتك
انا عاوز ست تستنانى أرجع والأقيها أرمى حمولى عليها ننام سوا ونضحك سوا وناكل سوا ست تلاقى وقت ومجهود لولادها
تشتغل مفيش عندى مانع لكن باقى يومها لجوزها وبيتها للاسف بنت حضرتك الجواز عندها كماليات تكمل بيه شكلها والمادة عندها اقوى من اى مشاعر جواز أو غيره
مفيش نصيب يا عمو
يلا يا بابا
أمشى قدامى يا وش النحس يا أميرة هو أنتى قلتيلى عنوانهم ايه
الو يا محمد أزيك بقولك خد العنوان ده عندك تهرب ضريبى
اه دخلها الشهرى نص مليون جينه و٠٠٠٠٠
أستنونى بكرة وحلقة جديدة
يجب عليك تسجيل الدخول لكتابة تعليق.